25.02.2017
Fevralın 25-də AMEA akademik H.Əliyev adına Coğrafiya İnstitutunda Xocalı faciəsinin 25-ci ildönümünə həsr olunmuş yığıncaq keçirildi.
Xocalı qurbanlarının xatirəsi bir dəqiqəlik sükutla yad edildi. Sonra İnstitutun direktoru, akademik Ramiz Məmmədov çıxış edərək bildirdi ki, 25 il
keçməsinə baxmayaraq Xocalı yarası hələ də qaysaqlanmamış, xalqımız bu faciənin ağrı-acısını yaşamaqdadır və bu tarix heç zaman yaddaşlardan silinməyəcək. Xocalı qırğınını törədənlər öz layiqli cəzalarına çatmayınca, Ohanyanlar, Sərkisyanlar, Köçəryanlar Beynəlxalq Haaqa məhkəməsinə təhvil verilməyincə, haqq-ədalət öz yerini tapmayınca Azərbaycan xalqının qəzəbi soyumayacaq, o bu yolda öz mübarizəsini davam etdirəcəkdir.
Akademik ölkə başçısının “Xocalı soyqırımının iyirmi beşinci ildönümü haqqında” Sərəncam imzaladığını diqqətə çatdıraraq, Coğrafiya İnstitutu gənclərinin “Xocalıya Ədalət” kampaniyası çərçivəsində keçirilən silsilə tədbirlərdə fəal iştirak etmələrini tövsiyə etdi.
İnstitutun həmkarlar təşkilatının sədri, c.ü.f.d. Habil Haqverdiyev öz çıxışında bildirdi ki, tarix boyu qonşu torpaqlarına göz dikən erməni separatçıları bu torpaqları öz ərazilərinə qatmaq üçün həmişə hiylələr işlətmiş, planlar quraraq fürsət axtarmışlar. Bu faciə iki yüz ilə yaxın bir müddətdə erməni şovinist-millətçiləri tərəfindən azərbaycanlılara qarşı müntəzəm olaraq həyata keçirilən etnik təmizləmə və soyqırımı siyasətinin davamı və ən qanlı səhifəsıdir.
H.Haqverdiyev Xocalı qırğınını dünya ictimaiyyətinə daha geniş çatdırmaq üçün dövlətin, eləcə də bir çox qurumların, təşkilatların məqsədyönlü işlər gördüyünü və bu fəaliyyətin nəticəsində bir sıra dövlətlərin Xocalı soyqırımını rəsmən tanıdıqlarını diqqətə çatdırdı. O bildirdi ki, bütün dünya ictimaiyyəti bu soyqırımını tanıyanadək uyqun tədbirlərin keçirilməsi vacib məsələdir.
Sonra mülki müdafiə qərargahının rəisi Namazəli Mustafayev söz alaraq, Xocalı soyqırımının təbliğində gənclərin rolundan danışdı. Vurğuladı ki, bu baxımdan Azərbaycan gəncliyinin üzərinə mühüm vəzifələr düşür. Onlar erməni millətçi-separatistlərini beynəlxalq aləmdə ifşa etməyə xidmət edən təbliğat-təşviqat kompaniyalarında yaxından iştirak etməli, xalqımızın başına gətirilən müsibətlər barədə ictimaiyyəti məlumatlandırmalıdırlar.
Tədbirin sonunda Xocalı faciəsini əks etdirən sənədli film nümayiş etdirildi.